蕙芳老師家學淵源，亻因父親李鶯輝先生是雙溪（老漳腔）「貂山吟社」已故會長，蕙芳老師本身也是臺灣合唱團 ê 成員，加上父親詩社家傳，對詩詞吟唱有真深 ê 造詣，亻因所吟唱 ê 「貂山調」誠有特色，退休了後，猶原一四界推拺詩詞吟唱，真使人欽佩。
以下是我個人所做 ê 筆記，記音照蕙芳姊--仔實際 ê 呼音，若有記賺(tānn) ê 所在，tsiah 請蕙芳老師不吝指教。普通 ê 漳泉韻母對應規律毋是本文重點，除非有必要，本文 tsiah 會特別註明。
一、春曉 Tshun-hiáu 孟浩然 Bīng Hō-jiân
春眠不覺曉 tshun-biân# put-kak-hiáu
處處聞啼鳥 tshù-tshù# bûn# thê-niáu
夜來風雨聲 iā-lâi# hong-ú-sing
花落知多少 hua-lo̍k# ti# to-siáu
分析：
1.坊間有人用「二三（五言）、二二三（七言）」tsióng-ê簡單个分拆法，來做詩詞吟唱本、變調 ê 規律，也就是五言 ê 第二、五字，七言 ê 第二、四、七字讀本調，賰--ê 讀變調，咱若真正聽詩社社友咧吟詩，就會發覺實情並毋是 hàn 簡單，親像即首五言 ê 絕仔，「聞」、「知」兩字就愛讀本調，tsiah 有符合傳統漢學仔先 ê 吟法。
2.孟浩然，阮鹿港有先生讀做 Bīng Hóo-liân，「浩」--字佇《廣韻》有「胡老切」、「古沓切」兩音，《唐韻》、《正韻》：「胡老切」，《集韻》：「戶老切」、「古老切」、「居號切」、「葛合切」，《韻會》：「合老切」，以上韻書 ê 記音分做三音，咱單掠《廣韻》、《集韻》ê 反切來分析。
「古沓切」是見母（全清）合韻（入聲）→「kap」，「浩」--字讀「kap」是孤指地名，不在咱討論 ê 範圍。「胡老切」是匣母（全濁）皓韻（上聲），「皓韻」漳腔讀「o」、泉腔讀「oo」，「胡老切」屬全濁上聲，照原底 ê 反切是「陽上聲」，受著「濁上歸去」 ê 影響，有 ê 會讀做「陽去聲」，比論講一般 ê 漳腔就是讀做第七聲。《集韻》另外收「古老切」、「居號切」，現代閩南語 ê 擬音是陰上 ê「kó/kóo」參陰去 ê「kò/kòo」。阮鹿港有漢學仔先共「浩」--字讀做「陰上聲」，權算是「全濁上」讀「陰上」ê 一例。
3.「處處」泉腔讀「tshìr-tshìr」、漳腔「tshì-tshì」，毋拄李老師因為來過臺北近別 ê 先生學過吟詩，所致伊已經是讀做普通腔（廈門腔）ê「tshù-tshù」。
4.即首詩押上聲十七篠(siáu)韻。
二、登鸛雀樓 Ting-kuàn-tshiok-lôo/liû 王之渙 Ông Tsi-huàn
白日依山盡 Pi̍k-ji̍t# i-san# tsīn
黃河入海流 Hông-hô# ji̍p-hái-liû
欲窮千里目 Io̍k-kiông# tshian-lí-bo̍k
更上一層樓 Kīng-sióng# it-tsîng-liû
分析：
1.只首詩押下平十一尤韻，「樓」--字 ê 文讀音，漳腔讀「lôo」、泉腔讀「liô」，誠濟詩社為著「叶韻(hia̍p-ūn)」，會共「更上一層樓」ê「樓」讀做「liû」，甚至 hiâm 題目(tuê-ba̍k)嘛讀做「登鸛雀樓 ting-kuàn-tshiok-liû」；毋拄嘛有誠濟漢學仔先並袂按呢做，sâng 款是讀做「lôo/liô」，阮鹿港是「liû/liô」有叶韻、無叶韻兩音計有人讀。
三、雜詩 Tsa̍p-si 王維 Ông Uî
君自故鄉來 kun# tsū kòo-hiong# lâi
應知故鄉事 ing-ti# kòo-hiong-sī
來日綺窗前 lâi-ji̍t# khí-tshong-tsiân
寒梅著花未 hân-muî# tio̍k-hua# bī
分析：
1.「維」--字漳腔讀「uî」、泉腔讀「î」；只首詩押去聲四真韻，去聲五未韻，真未韻通押，「事」--字漳腔讀「sī」、泉腔讀「sīr」、廈腔讀「sū」，李老師讀做漳腔ê 「sī」，以現代音來講，漳音上合只首詩 ê 韻跤。
2.「鄉」--字漳腔讀「hiang」、泉腔讀「hiong」，漳腔底 ê 李老師受著泉腔 ê 影響，已經是讀「hiong」無讀「hiang」--矣！
四、新嫁娘 Sin-kà-liông 王建 Ông Kiàn
三日入廚下 sam-ji̍t# ji̍p-tû-hā
洗手作羹湯 sé-siú# tsok-king-thong
未諳姑食性 bī-am# koo-si̍t-sìng
先遺小姑嘗 sian-khián# siáu-koo# siông
分析：
1.「娘」--字泉腔讀「liông」、漳腔讀「liâng」。
2.「嘗」--字泉腔讀「siông」、漳腔讀「siâng」，只首詩押下平七陽韻，李老師讀做泉腔ê 「siông」，實際呼音 tsiah 有符合韻跤，毋知怹父親老漳 ê 雙溪話，吟詩的時敢有讀做「siâng」？
五、芙蓉樓送辛漸 Hû-iông-lôo/liû# sòng Sin-tsiān 王昌齡 Ông Tshiong-lîng
寒雨連江夜入吳 hân-ú# liân-kang# iā ji̍p-gû
平明送客楚山孤 pîng-bîng# sòng-khik# tshóo-san ku
洛陽親友如相問 lo̍k-iông# tshin-iú# jû# siong-būn
一片冰心在玉壺 it-phiàn# ping-sim# tsāi gio̍k-hû
分析：
1.題目ê 「樓」--字讀「liû」，是受著叶韻 ê 影響，原本應當佇詩中則有為著叶韻來改變音讀ê 「liû」，尾手也變成題目 ê 正音。
2.「漸」--字佇《廣韻》收「子廉切(tsiam)」、「慈染切(tsiǎm)」兩音，其他 ê 韻書切音相同，「慈染切」濁上歸去後是讀做「tsiām」，李老師讀「tsiān」無佇傳統韻書 ê 規範，照講是受著華語 ê 影響。
3.只首詩 ê 韻跤是「吳」、「孤」、「壺」，照一般 ê 文讀音是「gôo」、「koo」、「hôo」，毋拄李老師讀做「gû」、「ku」、「hû」，拍算是因為只首詩押上平聲七虞韻 ê 關係。
4.「昌」、「陽」、「如」、「相」四字，李老師並無讀做漳腔 ê「tshiang」、「iâng」、「jî」、「siang」。
六、逢入京使 Hông# ji̍p-king-sù 岑參 Tsîm Sim
故園東望路漫漫 kòo-uân# tong# bōng# lōo# bân-bân
雙袖龍鐘淚不乾 song-siù# liông-tsiong# luī-put-kan
馬上相逢無紙筆 má# siōng# siong-hông# bû# tsí-pit
憑君傳語報平安 pîng-kun# thuân-gí# pò-pîng-an
分析：
1.「使」--字有陰上、陰去「勾破(khau-phuà)」兩讀，李老師讀陰去 ê「sù」，阮鹿港漢卿先讀陰上 ê「sír」，「使」--字讀陰上是做動詞 ê「to cause; to send; to use.」，讀陰去是做名詞 ê「a messenger」，ex.「使者」、「天使」，佇 tserâ 該當讀陰去 ê「sìr/sù」，杜建坊先生採錄永春人余承堯先生(1898-1993) ê 語料，亦是讀「逢入京使(sìr)」。
2.作者「岑參」只兩字，一般是讀做「gîm-sim/tsham」；阮鹿港漢卿先共「岑參」讀做「khiâm-tsham」，「岑」--字漢卿先嘛有讀做「khîm」，親像「岑夫子」，李老師讀做「tsîm」，是照《廣韻》「鋤針切」个中古音，《彙集雅俗通十五音》、《甘字典》、《當代泉州音字彙》、《日臺大辭典‧百家姓》計是收「gîm」，承堯先亦是讀「gîm-tsham」，《閩南方言大詞典》記「漳泉廈」三地 ê 「正音」是 tsîm 佮 tshîm 兩讀，另外記講「廈漳 俗音 gîm；泉 俗音 khîm」。漢卿先佇〈慈烏夜啼〉ê 尾句是讀「鳥中之曾參(serm)」。「岑參」 ê 「參」，照名義來講，應該愛讀做「tsham」。
3.「紙」--字漳腔讀「tsí」、泉腔讀「tsír」。
七、金谷園 Kim-kok-uân 杜牧 Tōo Bōo
繁華事散逐香塵 huân-huâ# sū-sàn# tiok-hiong-tîn
流水無情草自春 liû-suí# bû-tsîng# tshó# tsū-tshin
日暮東風怨啼鳥 ji̍t-bōo# tong-hong# uàn-thê-niáu
落花猶似墜樓人 lo̍k-hua# iû-sū tuī-lôo/liû-jîn
分析：
1.李老師強調「牧」--字是讀無入聲 ê「bōo」，tse 是《集韻》「莫侯切」ê 切音，一般是照《廣韻》、《集韻》、《韻會》 ê 「莫六切」讀「bo̍k」。
2.「春」--字讀「tshin」，是因為只首詩押上平十一真韻。
3.「墜樓人」ê「樓」，李老師講亻因「貂山吟社」是讀做「lôo」，因為伊受著臺北黃冠人先生 ê 影響，tsiah 綴咧讀做「liû」。
八、夜雨寄北 Iā-ú-kì-pok 李商隱 Lí Siong-ún
君問歸期未有期 kun# būn kui-kî# bī-iú-kî
巴山夜雨漲秋池 pa-san# iā-ú# tiòng# tshiu-tî
何當共剪西窗燭 hô-tong# kiōng-tsián# se-tshong-tsiok
卻話巴山夜雨時 khiok-huā# pa-san# iā-ú-sî
分析：
1.「商隱」兩字泉腔讀「Siong-ún」、漳腔讀「Siang-ín」，「漲」--字泉腔讀「tiòng」、漳腔讀「tiàng」，李老師計是「去漳入泉」。
2.只首詩押上平四支韻。